خد بالك من شهادتك اللي مكتوبة في الـ C.V

H.E.G : أ حسام الدين جمال

محمد : إسم وهمى

H.E.G : إزيك يا محمد ؟

محمد : الحمد لله يا فندم

H.E.G : أخبارك إيه ؟ كويس ؟

محمد : الحمد لله يافندم كويس جدا

H.E.G : أخبار الطريق معاك إيه والمواصلات ؟

محمد : والله يا فندم زحمه كل يوم ، بس مش بعيد قوى المسافه كويسه

 (( بعد ما دردشنا شويه وعرفته بنفسى وبالشركه وإبتديت أسأله بالتدريج ، وصلنا لمرحله قويه فى الإنترفيو وكانت كالتالى ))

H.E.G : أنا شايف فى CV بتاعك قدامى إن إنت معاك كورس فى التسويق .

محمد : أه يافندم فعلا أنا معايا كورس فى التسويق ، معتمد من ......ومعايا كورس فى ..ومعايا كورس فى ومعايا كورس فى .. ومعتمدين من ومن ومن ومن .....

H.E.G : طيب طيب يا محمد لا خلينى فى كورس التسويق الأول قولى يا محمد إيه اللى درسته تفصيلا فى الكورس دة ؟

محمد : إي إى إى التسويق والتعريف وخصائصه و . و . و ، يعنى ودرست كل البرنامج يا فندم التسويقى يا فندم

H.E.G : جميل يا محمد قولى بقى مين اللى كان بيديلك الكورس دة ؟

محمد : إي ، إى ......مش فاكر قوى يافندم والله أصل كان من فتره يعنى

H.E.G : واضح إن المحاضر مش مشهور قوى أو مافيش علاقه ربطتك بيه أو إحتكيت بيه علشان كده مش فاكر إسمه ، لكن مافيش مشكله ولا يهمك - بص يا محمد إحنا شركتنا بتشتغل فى منتج ............ - محتاج منك دلوقتى وإحنا مع بعض فى 15 دقيقه ، خطه تسويقيه مقترحه للمنتج بتاعنا وتكون بسيطه قوى ، وإعملها بالشكل اللى يريحك .؟

(( مش هقلكم إيه اللى حصل فى باقى الإنترفيو ، بس هقلكم رساله بلغتها لمحمد وببلغها لكل حد مكان محمد ))

H.E.G : بص يا محمد عارف لو كنت مجرد قارئ فى أحد كتب التسويق ، شوف يعنى يدوبك قريت كتاب فى التسويق ، كنت جاوبت إجابه نموذجيه ، وكنت على الأقل كتبتلى عناصر الخطه التسويقيه ، ساعتها يا محمد لما هتكتبهم وتجاوب بشكل كويس ، مكنشى هيفرق أبدا معايا كمسئول توظيف أو معانا كشركه إنت معاك 50 كورس ولا مش معاك ، ومعتمدين من ألمانيا ولا إنجلترا ، كل دة مكنش هيفرق أبدااااااااااا. ليه ؟ لأن كورساتك والدورات اللى معاك كانت هتظهر عليك وعلى إجاباتك .

عاوز أقلكم إنى من أول سؤال وعرفت إن محمد إما :

• - راح دفع فلوس فى أول الكورس وأخر يوم راح خد الشهادات أو
• - راح إشترى الشهاده علشان معتمده أو - دفع فعلا وكان بيروح بس مجرد جثه موجوده ، علشان يحسس نفسه إنه عمل اللى عليه .

ده نموذج صغير جدا جدا من اللى بنقابله فى المقابلات الشخصيه ، ولو ذكرتلكم نماذج أكبر من دة حاجه بسيطه هتلاقوا بلاوى. وأتمنى محدش فيكم يكون مكان محمد ، أو يتحط فى موقف محمد ، وتذكروا دائماً : مش مهم شهادتك معتمده منين ولا معاك كام شهاده ، المهم إنت بتعرف تعمل إيه ؟ هذا ما يعترف به سوق العمل الحالى وما سيعترف به مستقبل إداره الأعمال.

ويقول أ / حسام الدين جمال فى كتابته لبعض المواضيع والمقالات باللغه العاميه :

• أ - الموضوعات والمقالات سواء إن كانت إداريه أو غيرها تملأ الكتب والإنترنت ، وأصبحت بشكل عشوائى ، بل والبعض ينقل ما يقرأه فى كتاب كما هو موجود ، لذلك كان لابد من تواجد إسلوب يُعيد للقارئ محاولته للبحث عن معلومه جديده تُقدم له بشكل جديد .
• ب - كما أننى إخترت هذه الطريقه لكى أُشعر كل قارئ يقرأ موضوعاتى أو مقالاتى أننى أُخاطبه بشكل شخصى ، بل وكأننا فى لقاء مُباشر ، ليكون تأثير المعلومه أقوى .
• ج - كما أن هذا الإسلوب يجعلك تشعر وكأنك مُتعايش مع ما هو مكتوب ، وبالتالى أيضاً الإستفاده وترسيخ المعلومه سيكون أفضل .
• د - الإداره حينما تضطلع عليها بالكتب تشُعر بشئ من التعقيد لضخامه حجم مٌصطلحاتها ، وبذلك الإسلوب أستطيع أن اُرسل لك المعلومه بشكل بسيط ، وإسلوب تتقبله بعيداً عن التعقيدات .

HR- Hossam ElDin